Posible a bumayag pay ti pre-trial proceedings para iti impeachment trial ni Vice President Sara Duterte gapu iti kaadu ti dokumento a kasapulan nga adalen ken markaan.
Sigun kenni Atyy, Michael Poa, pannakangiwat ti kampo ti depensa ti bise presidente, adda pay laeng dagitoy iti panangmarka kadagiti dokumento a mabalinda nga aramaten kas ebidensya iti panagdengngeg iti kaso ti bise presidente.
Innayon daytoy nga addu pay dagiti dokumento a kasapulanda nga isimpa isu’t gapunna a manamnama ti proseso ti pre-trial agingga Hunyo 25.
Karaman kadagiti dokumento nga adadalen dagitoy ket dagiti report manipud iti Commission on Audit (COA), acknowledgment receipts, Statement of Assets, Liabilities and Net Worth (SALN), ken dadduma pay a record nga immunan a naipresenta iti House Committee on Justice.
Naituding a marugian ti impeachment trial ni Vice President Sara Duterte inton Hulyo 6, no sadino ti senado ti agserbi kas impeachment court. //bombokaren.c.sapirao
