Karit ita para kadagiti smoke free task force iti siudad ti Baguio ti pannakaaramat ti social media wenno ti online platform kas wagas para kadagiti distributors ti vape iti siudad.
Iti ekslusibo a pannakiuman tayo kenni Joshua Daniel Rivera, Communications Management Officer ti Smoke Free Task Force iti City Health and Social Office, numan pay adda dagiti makumkumpiskar a vapes kadagiti dropping areas, dinakamatna nga adda latta dagiti makaun-uneg a vapes gapu ta saanda a kontrolado dagiti maiparparang iti social media kas iti advertisements ti vapes, panagaramat ti paboritoda nga influencers , promotions kadagiti bars ken dadduma pay.
Innayon pay ni Rivera a maysa kadagiti estratehiya ti vape industry ket mang-engganyo kadagiti minors wenno estudyante.
Nupay kasta, agyamyaman daytoy iti pro-active ken awareness ti publiko iti siudad ken iti agtultuloy a panangireportda iti anyaman a maipanggep iti vape.
Malaksid, iti dayta, pinayamanan daytoy ti kooperasyon ken pannakikadua dagiti pagadalan ken unibersidad ti siudad gapu iti nainget a panangipawilda iti vape.
Impakaammo pay ni Rivera nga adadda a napapigsa ti kampanyada ken information education campaign da seknan iti nasao nga isyu.
Agtultuloy metleng ti surprise inspection ken makikokoordinarda metten iti PDEA nangnangruna ta alarming ti napasamak a pannakadiskubre ti marijuana kadagiti vape.
Maipalagip nga idi bulan ti Pebrero iti agdama a tawen, maysa a pagadalan ti siudad ti Baguio ti boluntaryo a nangiturnover ti vape a nagpositibo iti ramen ti cannabis Imbinglay met daytoy a maadaanda iti meeting kadua ti PDEA inton Lunes tapno mapagtalantanan pay ti maipanggep iti nasao a pakaseknan. // Bombo Noveh Organo
