Panggep ti smoke free task force nga iyuswat ita a tawen ti “Smoke Free Homes Project”, maysa a programa a manglapped iti panangngato ti kaso ti panagsigarilyo kadagiti pagtaengan.
Sigun kenni Joshua Daniel Rivera, Communications Management Officer ti Smoke Free Task Force ti City Health Servive Office, nupay bimmasit dagiti matiltiliw nga indibidual a manglablabsing iti Anti Smoke Ordinance iti Central Business District iti siudad, addu met dagiti matiltiliwda kadagiti nagduduma a babbarangay.
Gapu iti dayta, maysa kadagiti pokusda ita ket matulongan dagiti barangay officials, masuruanda nga usto ken panangipaay iti suporta a kasapulan dagitoy.
Malaksid iti dayta, pokusda metlaeng ti “SMOKE FREE HOMES PROJECT”
wenno pannakaincentivised dagiti babbalay no sadino awan ti asinoman a miyembro ti pagtaengan ti ‘smoker’.
Inlawlawag ni Rivera a mannarimaan pay laeng ti pannakadraft ti nasao a proyekto.
Nupay kasta, imbinglay ti nasao nga opisyal a babaen iti nasao a programa wenno initiatiba, maengganyo dagiti indibidual nga isardengda ti panagsigarilyo kadagiti pagtaengan dagitoy no sadino makaapapekto kadagiti kabalay ken kaaruba dagitoy.
Immunan nga impeksa ni Rivera a saanda a matiketan dagiti manglabsing gapu ta addada iti pagtaenganda no sadino maexexpose dagiti kabbalay ken kaarubada gapu iti epekto ti second-hand smoking.
Impettengna a delikado ti second-hand smoking no sadino adda dagiti nairekord da a pimmusay gapu iti daytoy.
Malaksid iti dayta, panggep ti nasao a programa a saanen a ngumato ti second-hand smoking kadagiti pagtaengan.
Sigun kenni Rivera, agpili pay laeng dagitoy iti sumagmamano a barangay a pangipadasanda iti nasao a programa.
Innayon daytoy a posible a maadaw dagiti dadduma a pagalagadan wenno wagas no kasanu a maiyemplementar daytoy manipud iti best practices ti Barangay Andres Bonifacio no sadino nabigbigda dagiti pagtaengan nga addaan ti miyembro ti pamilya nga agar-aramat ti sigarilyo ken dagiti smoke-free a pagtaengan.
Kinunana a nu kabaelan ti maysa a barangay daytoy, kabaelan met ti dadduma a barangay.
Immunan nga impeksa ni Rivera a narigat man nga isardeng ti panagsigarilyo ngem kabaelan daytoy ti amin babaen metlaeng ti suporta ti local government unit ken ti kapamilya dagitoy.
Innayon pay daytoy a posible maincetivized dagiti smoke-free homes babaen iti panangipaay ti tulong wenno benepisyo kas iti panagbalin a priority iti panang-avail kadagiti nagduduma a health services ti City Health Services Office ken district clinics wenno dadduma pay a posible a mabalin a mapanunot dagitoy a mabalin a maitulong kadakuada. // Bombo Noveh Organo
