Nangisayangkat ti City Market Division ken Sanitation Division iti clean-up ken panagikkat kadagiti daan nga estruktura iti Baguio Public Market idi Hulio 1 kas paset iti agtultuloy a kampania kontra iti peste, nangruna kadagiti utot.
Sigun iti lokal a gobierno, panggep iti operasion a maliklikan ti panagadu iti rodent infestation iti pannakitinnulongda kadagiti stall holder.
Paset daytoy iti direktiba ni Mayor Benjamin Magalong a mangipatungpal iti nainget nga anti-rat measures iti palengke.
Daytoyen ti maikalima nga addang iti siudad kontra iti problema iti utot iti nasao a pasilidad.
Saan a kas iti immuna a kampania, ad-adda a nainget ti baro a panangimplementar a nakapokus iti pagrebbengan dagiti vendor a pagtalinaeden a nadalus dagiti puesto, nga awanan iti incentive wenno gunggona.
Immunan a nagballaag ni Mayor Magalong a mabalin a maiserra dagiti paset iti palengke a maaddaan iti rodent infestation tapno maipaayan iti dalan iti nainget a panagdalus ken pest control.
