Kinarit ni House prosecution panel spokesperson ken Lanao del Sur Rep. Zia Alonto Adiong ti kampo ni Vice President Sara Duterte a sungbatanda dagiti alegasion iti Articles of Impeachment babaen ti ebidensia iti sangwanan ti Senate impeachment court, ken saan a babaen kadagiti press conference.
Sigun kenni Adiong, ti panangsungbat iti saludsod ket saan laeng a kasapulan ti maysa a press conference.
Inyunay-unayna a ti panangsungbat iti alegasion ket mangipaay iti espesipiko a kontra argumento tapno masungbatan ti alegasion.
Innayon ni Adiong a namnamaen ti prosecution ti legal motions ken dadduma pay a procedural moves iti rugi ti trial, gaputa saan paylaeng nga umdas ti sungbat ti depensa kadagiti alegasyon babaen kadagiti specific rebuttals.
Impetteng ti opisial a napukaw ni VP Sara ti gundawayna a mangsungbat kadagiti alegasion iti House of Representatives.
Sigun kenni Adiong, daytoy ti maysa a rason no apay nga adu a House members ti pimmabor wenno nag-botos a maipila ti impeachment case.
