Nangipaay iti financial assistance ti lokal a gobierno iti siudad ti Baguio kadagiti lokal a gobierno idiay Mindanao a naapektaran iti magnitude 7.8 a ginggined.
Sigun iti city government, personal nga impaay ni City Administrator Vittorio Jerico Cawis ti tulong pinansial kadagiti mayor idiay Glan, Malapatan, T’boli, Jose Abad Santos, Lake Sebu, ken General Santos City.
Immawat iti P600,000 ti General Santos City ken Jose Abad Santos, bayat a sag-P300,000 met ti dadduma a munisipyu.
Imbinglay ni Cawis ti nakaro a pannakadangran a sinagrap iti Glan ken Malapatan, nu sadinno rinibribu a pagtaengan ti nadadael ken adu a residente ti agtaltalinaed paylaeng iti evacuation centers.
Kinunana nga agtultuloy ti sumagmamano nga LGU iti operasionda iti temporario a pasilidad.
Mangipatulod metlaeng iti nagsina a P300,000 a donasion idiay Don Marcelino ken Sarangani Island.
Immuna nga inaprobaran iti City Council ti P3 milion manipod iti Quick Response Fund iti CDRRMC para iti nasao nga ayuda.
Sigun kadagiti opisial, paset daytoy iti agtultuloy a panagsungbat iti siudad tapno makatulong iti dagos a panagbangon dagiti naapektaran a komunidad.
