Naaktuan dagiti personnel ti Public Order and Safety Division ken barangay officials ti Cabinet Hill, Baguio City ti maysa a residente iti nasao a barangay nga agpupuor iti basura idi Hulyo 1.
Daytoy ket kalpasan a nakaawatda iti reklamo seknan iti isyu ti panagpuor kadagiti basura iti nasao a barangay.
Gapu iti daytoy, nakiddaw manipud kadagiti barangay officials a mangisaganada iti endorsement letter a maisumitir idiay City Environment and Parks Management Office (CEPMO) ken Health Services Office (HSO) para iti kaskenan nga aksyon.
Naduktalan a nabagaanen ti nasao a residente iti nasao nga aktibidad. Sigun kenni Punong Barangay Ricky Santiago, immunan a nabalaagan daytoy kabayatan iti inspeksyonda kadua ti Baguio City Police Station 3.
Nupay kasta, nadanonda latta daytoy nga agpupuor kadagiti loose waste materials pakairmanan dagiti bulbulong ken ruot.
Mailabsing daytoy iti City Ordinance No. 571, Series of 1973, a mangipawpawil iti open burning iti siudad ti Baguio.
Inlawlawag met dagiti POSD enforcers ti nasao nga ordinansa iti nasao a residente ken ti saan a nasayaat nga epektona ti panagpuor iti salun-at dagiti residente ken iti aglawlaw. //bombokaren.c.sapirao
