Naipabuya iti maikatlo nga aldaw ti impeachment trial ni VP Sara Duterte ti maysa a video clip ti emosyonal a press conference ni Atty. Zuleika Lopez idi Nobyembre 23, 2024.
Inaramat daytoy ni Defense Counsel Atty. Carlo Joaquin Narvasa iti cross-examination na kenni kay National Bureau of Investigation (NBI) Senior Agent John Mark Calilung tapno tingitingen ti konteksto ken kredibilidad ti naisayangkat nga open-source investigation ni Calilung iti maatap a panagpangta ni VP Sara kontra kenni President BBM, First Lady Liza, ken former House Speaker Romualdez.
Iti naiparang a video clip, naimatangan nga emosyonal ni Undersecretary Zuleika Lopez, Chief of Staff ti Office of the Vice President kalpasan a napatawan daytoy ti contempt ti Kamara.
Impettengna ti nalabes a danagna para iti biyagna gapu iti posible a pannakaiyakarna idiay Correctional Institution for Women idiay Mandaluyong City idi.
Binabalaw ti depensa ti nakasurat iti transcript nga inaramid ni Calilung.
Sigun kenni Atty. Narvasa, adda dagiti nakitana a ‘loophole’ wenno kurang a sarita kas iti ‘detainee’ ken ‘accused’ nga insawang ni Lopez ngem saan daytoy a nairaman iti opisyal a dokumento ti National Bureau Investigation.
Impetteng metlaeng ti depensa a ti panangdakamat ni VP Sara iti ‘kill order’ ket gapu laeng iti emosyon ken panagdanag gapu iti panagdanagna iti napasamak iti Chief of Staff daytoy. //bombokaren.c.sapirao
