Impaganetget ni La Union Rep. Paolo Ortega a saan a “fishing expedition” ti tignay ti House prosecution panel a mang-subpoena kadagiti financial ken tax records ni VP Sara Duterte.
Maikontra daytoy iti alegasion ti defense camp nga agbirbiruk paylaeng ti House panel iti ebidensiya, babaen iti panagpalawada iti sakup ti kiddawda a subpoena.
Sigun kenni Ortega, paraman laeng ti prosecutor dagiti ebidensiya a naiparang iti panagdengngeg ti House Justice Committee.
Inlalawagna a ti panang-subpoena kadagiti kanayonan a bank ken financial records ket tapno maidatag ti kompleto a kinabaknang ti Bise Presidente ken ti pamiliana.
Innayon ti mammanday-linteg a ti kaso ni VP Sara ket nakadanon iti trial proper, isu’t gapuna a maitutop laeng a maiparang amin a banag maipapan kadagiti pinansial a rekords daytoy.
Impetteng ni Ortega a no saan a mapatgan ti kiddawda, nakasagana ti prosecution team nga ipresenta dagiti adda kadakuada a financial records ni VP Sara.
