Napilaanen ti kaso a panaglabsing iti Republic Act 11926 wenno An Act Penalizing Willfull and Indiscriminate Discharge of Firearms ken panaglabsing iti Republic Act 10591 wenno Comprehensive Firearms and Ammunition Regulation Act, nga impila met ti PNP, ti dua nga indibidual kalpasan a nagpaltog dagitoy iti maysa a lote idiay Crystal Cave, Bakakeng Central Baguio City, baba laeng iti Gulf Horizon Subdivision, Suello Village, Bakakeng Central, Baguio City.
Dagiti suspek ket agtawen iti duapulo ket siam, awanan trabaho ken residente iti KM3, Asin Road, Baguio City ken ti kwarenta-anyos a maysa a mannalon ken residente iti Suello Village, Bakakeng Central, Baguio City.
Iti imbestigasion iti pulisia, bayat a nakaduty ti umuna a complainant nga agtawen iti uppat a pulo ket innem, security guard iti asideg iti nakapasamakan ti insidente, kellaat a naalarma, nagdanag ken nadisturbo idi nakanggeg iti nagsasaruno a kanalbuong iti paltog a dumanon iti uppat a daras manipod iti shanty iti maysa kadagiti suspek.
Impadamagna a dagos ti insidente iti pulis nu sadinno impeksa ti complainant a ti suspek ken ti kaduana ket pimmanaw usar iti footpathc paturong iti Suello Road.
Indauloan ni PCPT Charly Galao-ey, Acting Station Commander iti BCPO Police Station 10 ti panagberipikar iti nasao nga impormasyon.
Apaman a naberipikarda ti nasao nga impormasion babaen iti panagturongda iti nakapasamakan iti insidente, dagosda a nagayab iti back-up manipod iti City Mobile Force Company (CMFC) , Special Weaponss and Tactics (SWAT) ken Mobile Patrol Unit (MPU) para ti pannakatiliw dagiti suspek.
Sinapul amin dagiti nasao nga yunit pakairamanan ti complainant ti area nangruna iti nagnaanda agingga a nakadanonda iti maysa a shanty iti Suello Village.
Iti dayta a gundaway, maysa kadagiti kadua ti suspek nga addaan iti ligal nga edad ti nangibaga a nasaksianna ti panangpalpaltog dagiti suspek nu sadinno nagtulag dagiti dua a suspek.
Ditana metlaeng nga intudo ti maysa a nangisit a crossbody bag a naglaon ti paltog nga inaramat dagiti suspek a maysa a caliber 45 nga adaan iti maysa a magazine ngem awanan ti bala.
Malaksid iti dayta, nakitada ti maysa a silicon storage case a naglaon ti dose a calibre 45 with/and live ammunition.
Positibo met a nabigbig ti complainant dagiti suspek.
Innayon pay iti nakasaksi a ti paltog ket kukua iti agtawen iti 40 a mannalon a suspek. Intedna ti paltog iti kaduana nga isut naaramat iti panangpalpaltog.
Iti kaudian a report iti pulisia, agtaltalinaed iti kustodiya ti kapulisan dagiti suspek. | via Bombo Noveh Organo
