Nakailista ti Baguio City Police Office Station 7 iti dua a kaso ti panagtakaw iti maysa laeng nga aldaw.
Maibasar iti report ti kapulisan, immuna a napasamak ti panagtakaw iti uneg ti maysa a supermarket idiay Harrison Road, Baguio City iti pasado alas-singko ti malem ngem naireport laeng daytoy iti alas-otso ti rabii.
Nabigbig ti suspek kas 23-anyos a babae, awanan trabaho ken residente ti Barangay Ambiong, Baguio City.
Iti imbestigasyon dagiti kapulisan, naobserbaran ti customer relations assistant ti suspel nga agilemlemeng iti nagduduma a groceries iti uneg ti maysa a tote bag bayat nga agshopshoping daytoy.
Inmonitor ti complainant ti suspek babaen iti CCTV ken inalertona met ti witness tapno agbantay iti exit.
Kalpasan a nagbayad ti suspek kadagiti items nga ada laeng iti basketna, nag-exit daytoyen.
Sinmabat met ti witness ket apaman nga ininspekna dagiti ginatang ken bag ti suspek, narekober ti sumagmamano a saan a nabayadan nga assorted groceries nga agatad iti P659.75 manipud iti tote bag na.
Iti sabali a bangir, napasamak ti maysa pay a kaso ti panagtakaw iti maysa a department store idiay Session-Gov. Pack, Baguio City pasado alas-syete ti rabii ngem naireport laeng daytoy iti pasado alas-nuebe ti rabii.
Dagiti suspel ket maysa a lalaki nga agtawen iti 45, awanan trabaho ken residente ti Tuguegarao, Cagayan ngem agdama nga agnanaed idiay New Lucban, Baguio City kaduana ni maysa pay a lalaki nga agtawen iti 24 ken residente ti Bacolod City.
Iti inisyal nga imbestigasyon ti kapulisan, napaliiw ti witness ti maikadua a suspek nga agiduldulin kadagiti nagduduma a mens care products iti uneg ti backpack ti umuna a suspek.
Gapu iti dayta, inmonitor ti witness dagiti garaw dagiti suspek.
Rinumuar dagiti suspek iti department store a saan a nagbayad kadagiti indulinda nga items. Apaman a kinomprontarda dagitoy, awan ti naipakita dagiti dua a suspek a resibo.
Ditoyda metten a tiniliw ti dua a suspek ket narekoberda ti nagduduma nga mens care items pakairamanan ti tshirts nga addan iti pakabuklan a gatad nga P8,945.00.
Iti kaudian a report ti kapulisan, maisagsaganan dagiti kaskenan a dokumento seknan iti dua a kaso ti panagtakaw para iti inquest processings dagiti natiliw a suspek. // Bombo Noveh Organo
