Nagballaag ti Philippine Coast Guard (PCG) seknan iti posible a pannakatnag ti rocket debris ti China iti taaw a masakupan ti Northern Luzon.
Naituding nga ipatayab ti China ti Jielong-3 rocket manipud Haiyang, Shandong Province iti nagbaetan ti 10:29 a.m ken 11:04 a.m, oras ti pagilian intun Miyerkules, Agosto 5, 2026.
Maibasar iti Philippine Space Agency, kinuna ti Coas Guard Distric North Eastern Luzon a posible nga iti exclusive economic zone (EEZ) ti Pilipinas ti drop zone ti nasao a rocket.
Posible a matnag dagiti dadduma a paset ti rocket iti Drop Zone 1 a masarakan iti 94 nautical miles sadiay Babuyan Island ken 143 nautical miles manipud sadiay Sta. Ana, Cagayan.
Nainget nga ibilbilin ti ahensiya kadagiti barko, mangngalap ken dadduma pay a dumaldalyasat iti taaw a liklikan dagiti nasao a drop zone, nangruna dagiti nadakamat a lugar.
Makidkiddaw metlaeng a dagus nga ipakaammo iti PCG unit dagiti anyaman a mapagduduaan a rocket debris.
