Naipasaran ti meat shop idiay Kayang Street, Baguio City kasaruno iti panangduktal ti City Veterinary Office nga agilaklako daytoy iti nadadael a karne.
Maipalagip nga idi napalabas a bulan, nakumpiska manipud iti nasao a meat shop ti agarup 240 kilo a nadadael a karne ti manok kasaruno iti maysa a reklamo manipud iti kustomer daytoy.
Immuna metten nga inwaragawag ti City Veterinary and Agriculture Office nga adu a bilang ti panaglabsing ti inaramid ti nasao a pwesto.
Maipalagip nga inyeblas metlaeng ni Baguio City Mayor Benjamin Magalong a maipasara ti nasao a pwesto ken mapilaan ti kaso ti akintagikua iti daytoy.
Inwaragawagna pay a makikoordinar daytoy iti National Meat Inspection Service (NMIS) tapno maamuwan dagiti dadduma pay a pannusa iti sidung ti national a linteg a mabalin a maipataw malaksid iti pannakairikep daytoy.
Kagidan dayta, binalaaganna amin nga aglaklako a saanda a mangilako kadagiti nadadael a taraon. Sigun kenkuana, saanna a palabsen ti kastoy nga aramid ken maiparikep dagiti establisyemento a maduktalan a mangar-aramid iti daytoy.
Guyguyugoyenna met dagiti residente nga ireportda dagiti mapagduaduaan a kapada nga aramid babaen iti panangawag iti 911 emergency hotline ti siudad para iti naparpartak nga aksyon. //kcs//
