Naituding a sumango iti witness stand ti uppat a testigo iti agtultuloy nga impeachment trial kontra kenni VP Sara Duterte inton Agosto 10 agingga Agosto 12.
Karaman ditoy ni Xylene May del Campo, supervising auditor manipud iti Commission on Audit–Intelligence and Confidential Funds Audit Office (COA-ICFAO) a nagtestigo metlaeng ita nga aldaw. Agtestigo daytoy seknan iti maatap a saan nga umno a panagaramat iti pondo ken likidasyon iti P612.5 milton a confidential funds ti Office of the Vice President (OVP) ken Department of Education (DepEd).
Karaman pay kadagiti naituding nga agtestigo ket da Marivic Pareja, dadaulo ti House Archives, Gina Acosta, sigud nga Special Disbursing Officer ti Office of the Vice President (OVP). Ni Acosta ti nakaigem ken nangiruwar kadagiti pundo iti sidung ti panangidaulo ni VP Sara.
Sumango metlaeng ni Edward Fajarda, sigud nga Special Disbursing Officer ti Department of Education (DepEd). Ni Fajarda ti nadutokan a responsable iti pananggastos ken panangiwaras ti confidential funds idi ni VP Sara ti nagtugaw kas DepEd Secretary.
Inbilin met ni Presiding Officer Chiz Escudero ti panangi-isyu iti subpoena kadagiti nadakamat a testigo tapno agatendarda iti hearing inton umay a lawas.
Agsubli ti trial inton Lunes, Agosto 10 iti oras ti alas-dyes ti agsapa. //bombokaren.c.sapirao
