Inwaragawag ni Transportation Secretary Giovanni Lopez a suspendedo paylaeng ti pannakaipangato ti pamasahe kadagiti amin a public utility vehicles (PUV) iti baet ti panagngato ti presyo ti lana ken inflation.
Sigun kenni Lopez, inyunay-unay ni President Ferdinand Marcos Jr. a saan a rumbeng a maipabaklay kadagiti pasahero ti responsibilidad ti gobierno a mangrisut iti isyu seknan iti panagngato ti presyo ti lana.
Innayun ti ahensiya a tapno malag-anan dagiti PUV drivers, maipangato ti fuel subsidy iti P12 tunggal litro.
Malaksid iti subsidiya, mailaylayun agingga iti ngudo ti agdama a tawen ti Parañaque Integrated Terminal Exchange terminal fee waiver para kadagiti PUVs.
Makaawat metlaeng dagiti Provincial buses iti toll discounts wenno exemptions iti North Luzon Expressway ken South Luzon Expressway nga agrugi intun August 10, 2026.
