Impaganetget ni state auditor Xylene del Campo nga iregular ti panagaramat iti Office of the Vice President (OVP) iti P375 milion a confidential funds idi 2023.
Iti impeachment trial ni Vice President Sara Duterte, kinuna ni Del Campo a saan a confidential ti pakabigbigan dagiti supplier isut gapuna a kasapulan a mangisubmitir ti OVP kadagiti resibo wenno invoice kas pammaneknek kadagiti nagatang a suplay, agas, ken taraon.
Sigun kenkuana, mabalin a confidential ti panggep iti panaggatang, ngem saan a confidential nga establisimiento ti naggatanganda.
Innayonna nga standard procedure kadagiti ahensia iti gobierno ti panangala iti resibo kas dokumentasion kadagiti gastos.
Maibasar iti accomplishment report iti OVP, P40 milion ti nagastos daytoy para kadagiti agas ken taraon manipod Abril 25 agingga Hunyo 30, 2023.
Kinuna ni Del Campo a saan nga umdas ti dadduma pay a supporting documents tapno mapaneknekan ti nasao a panaggatang.
