Agtultuloy ti panangipaay ti City Social Welfare and Development iti tulong para kadagiti pamilya a naapektaran iti panagreggaay ti daga idiay Guisad Surong, Baguio City pakairamanan dagiti pamilya a naawanan iti ay-ayatenda iti biyag.
Sigun kenni Liza Bulayungan, dadaulo ti City Social Welfare and Development, mannarimaan ti panangippaayda iti assistance kadagiti apektado a pamilya iti siudad gapu iti naglabas a bagyo ken habagat.
Innayon daytoy nga iti agdama, agarup 220 a pappamilya a bukbuklen ti agarup 1000 nga indibidual ti as-asistaran ti opisina da.
Seknan met kadagiti biktima iti napasamak a landslide idiay Guisad Surong, kinuna ni Bulayungan a dumanon iti 27 a pamilya ti naapektaran gapu iti napasamak a landslide.
Iti agdama, ada pay laeng dagitoy idiay Baguio International Academy no sadino ditoy ti nagbakwitanda kasaruno iti napasamak a landslide.
Inwaragawag metlaeng ni Bulayungan a mannarimaan ti panangipaayda kadagiti suplay,taraon ken danum, kagawaan, ken dadduma pay saan laeng a kadagiti pappamilya manipud Guisad Surong nu di ket pati metlaeng kadagiti pappamilya nga ada kadagiti dadduma pay nga evacuation centers.
Sigun kenni Bulayungan, dumanon iti agarup 15 ti aktibo nga evacuation centers iti siudad ti Baguio pakairamanan kadagiti masarakan idiay Dominican Mirador, San Luis, Kias, Asin, Manuel Roxas, Guisad Surong, ken dadduma pay. Karaman metlaeng ditoy ti dua a simbaan a nangilukat iti ruanganda para kadagiti naapektaran a pappamilya.
Impeksa metlaeng ni Bulayungan nga ada ti nakasagana pinansyal a tulong a maipaay kadagiti pamilya a naawanan iti ayayatenda iti biyag ngem ipaayanda pay ti oras dagitoy nga agladingit.
Nupay kasta, posible a maipaay daytoy kadagiti maseknan a pamilya ita a lawas tapno ada met ti maaramat dagitoy. //bombokaren.c.sapirao
