Inwaragawag ni House trial spokesperson Zia Alonto Adiong a P473,000 ti maatap a gastos ni Vice President Sara Duterte iti tunggal oras, tapno maibus ti P125 million a confidential funds iti las-ud laeng ti 11 nga aldaw.
Sigun kenni Adiong, napartak ti pannakagastos ti kuarta ken no mai-quantify, maysa laeng nga oras ti pannakagastos ti P473,000.
Maipalagip a nakaawat ti OVP iti P125 million a cash advance idi Disyembre 2022 a dagus a naibus manipud Disyembre 21 agingga 31.
Sigun iti COA, ti confidential funds ket cash advances a maipaulog iti naenget a pagannurutan ken saan a mabalin a mai-reimburse.
Impetteng ni Adiong a saan laeng a simple nga accounting error daytoy.
Kinuwestionaran metlang ti nasao nga opisial no mapagtalkan ti bise presidente iti pannakaaramat ti resources ti gobierno.
