Nagsapata ti agarup 258 a baro a recruited ken apointed patrolmen ken patrolwomen ita nga aldaw idiay Masigasag Grandstand ti Police Regional Office Cordillera Administrative Region (PRO CAR) sadiay Camp Major Bado Dangwa, La Trinidad, Benguet.
Pito pulo iti nasao a bilang ket dimmalan iti regular recruitment bayat a dagiti 188 met ket nahire babaen iti attrition recruitment program.
Agarup 197 kadagitoy ket lallaki bayat a 62 met ti babbai.
Indauloan ni Regional Director PBGEN NOEL VALLO ti nasao a seremonya kas Administer Officer, kaduana dagiti miyembro iti Command Group, Regional Staff, Police Training Center-CAR (PTC-CAR) staff, ken National Police Commission-Cordillera (NAPOLCOM-CAR) nga indauluan ni Regional Director Atty. Henry M. Dungala.
Dimmar-ay metlaeng ditoy dagiti pamilya dagiti barbaro a miyembro ti Philippine National Police (PNP).
Pormal a naiturnover dagiti baro a recruite iti Regional Education and Training Division ken Police Training Center – Cordillera Administrative Region (PTC-CAR)para iti panagensayo ken preparasyonda iti panagserbi kas pulis kalpasan iti panagsapata dagitoy.
Kinarit ni PBGEN Vallo dagiti baro a recruits a paneknekanda a maiparbengda iti talek a naipaay kadakuada ken ipakitada a maiparbeng dagitoy nga agbalin a paset iti Police Regional Office-Cordillera Administrative Region (PRO-CAR) kas “Home of the Most Disciplined Cops”.
“Wearing the police uniform is a privilege that comes with great responsibility. Your actions will reflect not only who you are but also the organization you represent. Carry with you the values of discipline, integrity, and genuine service,” sigun kenni Vallo.
Kabayatanna, maipasidung dagiti baro a recruit iti innem a bulan a Public Safety Basic Recruit Course (PSBRC) ken sabalinto pay ti innem a bulan para ti Field Training Program (FTP) sakbay nga agbalin dagitoy a full-fledge police officers.
Iti sabali a bangir, sigun iti maysa kadagiti baro a recruit maragsakan, emotional ken excited daytoy. Agserserbi met kas motivationna ti nagannak ken daduma pay a kabagyanna para ti panagballigi daytoy. Agyamyaman met daytoy iti awan sarday a suporta kenkuana ti nagannak ken pamilyana.
Kabaytanna, maragsakan met ti nanang daytoy gapu ta balligi a nakastrek ti anakna iti nasao a serbiyo. Daytoy met ti maikadua nga annakna ken umuna nga agbalin a pulis iti pamilyada. //via Bombo Noveh Organo
