Posible a marikna dagiti konsumers ti pannakakissay ti singil ti koriente intun Nobiermbre gapu iti pannakaikkat ti 12% value-added tax (VAT) iti allowable system loss charges dagiti power utility.
Sigun iti Energy Regulatory Commission (ERC), nakipagtaripnong daytoy kadagiti stakeholder tapno mai-pinal ti mekanismo para iti pannakaipatungpal ti baro a patakaran iti Bureau of Internal Revenue (BIR).
Punterya ti ahensiya a maipatungpal ti pannakaikkat ti VAT iti system loss charge intun Oktubre nga agepiktibo iti bill dagiti komsumer intun Nobiembre.
Iti sidong ti Revenue Memorandum Circular No. 97-2026 ti BIR a naipaulog iti Setiembre 14, saan a maipataw ti 12% VAT ti system loss charges a saklawen ti limitasyon nga intuding ti ERC.
Ibilbilang ti BIR ti nasao a singir a government-mandated pass-through cost isu’t gapuna a saanton a maipabaklay iti VAT.
Impaganetget ti ERC ti agtultuloy a koordinasyon daytoy kadagiti stakeholders tapno masigurado ti naannayas ken aggigiddan a pannakaipatungpal ti baro a polisiya kadagiti power utilities iti pagilian.
