Kinidaw ti kampo ni sigud a President Rodrigo Duterte iti International Criminal Court (ICC) Trial Chamber a bilinenda ti prosekusyon a limitaranda dagiti bilang ti ebidensya ken dokumento gapu ta dimmanonen daytoy iti agarup 1,000%.
Nangipila ni defense counsel Peter Haynes iti mosyon idi Biyernes, Setyembre 25, a mangkidkiddaw iti Trial Chamber a limitaranda dagiti ebidensya iti 10,000 laeng.
Dimmanon ngaminen iti 62,130 a listaan ti dokumento ken ebidensya ti impresentar ti prosekusyon para iti nasao a kaso.
Sigun iti depensa, saanda a kabaelan a tingitingen amin nga ebidensya nga impresenta ti prosekusyon sakbay iti trial. Impettengda metlaeng a sumagmamano kadagiti materyales nga immunan a kinitada ket awan ti nadagsen a koneksyonna iti kaso.
Gapu iri daytoy, kinidaw ti depensa iti Trial Chamber a bilinenda ti prosekisyon a mangbukel iti baro a case record agingga inton Oktobre 7 no sadino malimitaran laengen iti 10,000 a dokumento ti mabalinda nga ilatag.
Sumangsango ni sigud a President Duterte iti kaso a crimes against humanity mainaig kadagiti panangpapatay iti adu nga indibidual iti war on drugs campaign daytoy idi daytoy ti nagtugaw kas mayor ti Davao City ken idi nagserbi daytoy kas Presidente ti pagilian a Pilipinas.
