Binabalaw ni Daryll Kim Longid, mangidadaulo iti Public Order and Safety Division (POSD) ti siudad ti Baguio ti napasamak a panangdadael ti sumagmamano nga illegal peddlers kadagiti lako da a prutas kabayatan iti operasyon dagiti POSD Personnel.
Sigun iti pablaak ni Longid, impeksana nga adda dagiti illegal peddlers nga adadda a pilienda a dadaelen dagiti bukod da a lako imbes a palubosanda daytoy a maipaay iti City Social Welfare and Development (CSWD) ken Department of Social Welfare and Development (DSWD) Shelters.
Binabalaw met ti nasao nga opisyal ti panangsuporta ti sumagmamano kadagiti violators, no sadino impeksana a maik-ikikkan laeng dagitoy iti tured a manglabsing iti linteg iti siudad ti Baguio.
Indiligna metlaeng dagiti nasao nga indibidual iti bidyu kadagiti Cordilleran peddlers no sadino kinunana a saan a makita ti kinagulo dagitoy, saan a kas kadagiti dadduma a makiapada. Inlawlawagna nga apaman ngamin a matiliw dagitoy, makisupiatda man iti apagkanito ngem agsubmitirda metlaeng.
Impeksa pay ni Longid a nadanonen ti siudad ti Baguio iti carrying capacity daytoy 20 a tawenen ti naglabas ket nu agtuloy ti panangsuport iti publiko kadagiti agtataud iti baba tapno ag-illegal peddling iti siudad, maikanda iti ideya a mangawag pay kadagiti kakaduada manipud kadagiti nagapuanda a probinsya tapno agyan dituy siudad.
Kagidan dayta, impettengna a kas maysa a komunidad, adda ti moral responsibility iti tunggal maysa a saan a mangsuporta kadagiti illegal trade, tumulong a magsalwad kadagiti legal nga agnegnegosyo, ken kadagiti mangmangged babaen iti patas a pamay-an.
Mangnamnama met daytoy a malawlawagan ti publiko seknan iti daytoy nga issue.//kcs//
