Inlawlawag ni Daryll Kim Longid, mangidadaulo iti Public Order & Safety Division – Baguio, ti maysa a video nga impablaakna no sadino maimatangan ti panangibadbaddek dagiti illegal peddlers kadagiti lako da a prutas kabayatan iti operasyon dagiti kameng ti nasao nga opisina.
Iti pannakiuman ti Bombo Radyo kenni Longid, inlawlawagna a naobserabaranna a kastoy ti kadawyan nga araramiden dagiti illegal peddlers a matiliwanda ita a panawen.
Impettengna nga adu pay dagiti kapada a pasamak malaksid pay iti impablaakna a video.
Imbinglayna metlang a naklaat daytoy kalpasan a naduktalanda a dua kadagiti indibidual a karaman iti nasao a video ket night market vendors. Sigun kenni Longid, gapu iti inaramidda, adda ti epektona daytoy iti panagbalinda a miyembro iti Night Market.
Innayon pay ni Longid a ti inaramid dagitoy ket mangipakita iti kinaawan respeto kadagiti POSD Personnel ken saan a nasayaat nga aramid.
Impeksana a nangipatulod metten ti POSD iti surat iti Baguio City Market Authority seknan iti pakainaigan dagiti miyembro da ken mannarimaanen iti panagadalda nu anya dagiti mayanatup nga addang a kasapulan a maaramid kadagiti miyembroda a karaman iti napasamak nga insidente.
Sigun pay iti nasao nga opisyal, ada met iti karbenganda a mangtiliw kadagiti illegal peddlers ngem ngamin iti assessment da, adadda ngamin nga agbalin nga agresibo dagitoy nu pilitenda isuda nga iturong iti opisinada ken masansan grupo-grupo dagiti illegal peddlers isu’t gapunna a sigun kenni Longid, inyunay-unayna kadagiti POSD personnel nga ipangpangrunada latta ti seguridad dagitoy.
Imbinglay metlaeng ni Longid a nagkonsultada metten iti City Legal nu anya dagiti legal action a mabalin a maiyaplikar iti napasamak. //kcs//
