Impeksa ni Lito Wayas, mangidadaulo iti grupo a PISTON iti Baguio-Benguet a kiddawda ita ti long term solutions kadagiti pakaseknan iti sektor ti transportasyon iti probinsya ti Benguet ken Baguio City.
Iti pannakiuman ti Bombo Radyo kenkuana, impeksana a karaman kadagiti kidkiddawenda a long term solution ket ti pannakaibasura dagiti saan a nainkalintegan a linlinteg wenno polisiya iti gobyerno nga agtultuloy a mangparparigat kadagiti babasit nga operators ken drivers .
Karamanen ditoy ti panakkaikat ti Oil Deregulation Law, excise tax , ken Value Added Tax (VAT) kadagiti produkto a petrolyo.
Sigun kenni Wayas, apaman a mawaswas ti oil deregulation law, adda ti ikasta ti gobyerno a mangtengngel iti presyo ti lana.
Maysa metlaeng nga onga-ong ti nasao a grupo ket ti pannakaingato ti sueldo dagiti mangmangged, tapno awan ti mabati a marigatan iti agdama a sitwasyon.
Kabayatanna, impeksa ni Wayas nga iti agdama, mariknada iti kinarigat iti sitwasyon gapu ta iti agdama, awanen ti maiyawid dagiti babbasit a drayber ken operator a kita iti agmalmalem.
Malaksid iti dayta, mariknada metlaeng iti rigat gapu ta kagidan iti panagngato ti presyo ti petrolyo ti panagngato met dagiti presyo ti gagatangen.
Imbinglayna nga adda met dagiti ipapaay ti gobyerno kadakuada a programa, saan latta nga umdas dagitoy.
Kabayatanna, impakaammo ni Wayas a maipatungpal ti maysa nga educational forum ita nga aldaw idiay Japanese Garden tapno adalenda dagiti pudno a pakasekan iti sektor ti transportasyon ken anya dagiti posible a solusyon para kadagitoy. //kcs//
INTAY DENGGEN TI PASET TI PANNARITA NI LITO WAYAS, MANGIDADAULO ITI GRUPO A PISTON DITOY BAGUIO-BENGUET
