Nasarakan ken nakasubli iti Baguio City ti 16-anyos a babai kalpasan a naireport a missing idi rabii ti September 29, 2026.
Iti October 1, 2026, naawat ti Baguio City Police Station 7 iti report maipapan iti pannakapukaw ti menor de edad a babai a naudi a nakita iti pagtaenganda iti Baguio City.
Gapu iti daytoy, dagus a nangisayangkat iti imbestigasyon dagiti personnel ti Women and Children Protection Desk ti Police Station7, kadua dagiti dadduma pay a personnel ken kameng ti pamilya ti menor de edad, babaen iti CCTV backtracking manipud iti lugar a naudi a nakakitaan kenkuana ken kadagiti posible a ruta a nagnaanna..
Naipakaammo met ti deskripsion ken ladawan ti ubing babaen iti flash alarm kadagiti patrollers ti Police station 7 ken dadduma a police station tapno makatulong iti pannakasarak kenkuana.
Iti agarup alas-8:30 ti rabii ti October 1, nakita ti shared location ti cellphone ti ubing nga adda daytoy iti maysa a bus terminal sadiay Cubao, Quezon City.
Gapu iti daytoy, dagus a nakikoordinar ti Police Station 7 iti Quezon City Police District- Police Station 10 iti Kamuning ken dimmawat iti tulongda iti pannakasarak ken pannakaprotektar iti nasao nga ubing.
Iti agarup alas-9 ti rabii iti isu met laeng nga aldaw, nasarak ken nasigurado dagiti patrolling personnel ti Quezon City Police District- Police Station 10 ti ubing iti bus terminal.
Dagus met a naipakaammo kadagiti nagannakna ti kasasaadna, ket dagus a nagturongda sadiay Metro Manila.
Iti agarup alas-7 ti bigat ti October 2, addan iti nasayaat a kasasaad ti ubing, kadua dagiti nagannakna.
Iti agdama, manarimaan ti imbestigasyon babaen iti Women and Children Protection Desk ti Police Station7 para maamoan iti rason a nakadanun daytoy sadiay Quezon City.
Impasigurado ti otoridad nga addan iti nasayaat ken natalged a kasasaad ti ubing.
Sigun iti initial investigation, boluntaryo ti panagturongna iti lugar ket awan iti force wenno intimidation a napasamak.
Pinagyamanan met ti pamilya ti menor de edad dagiti kameng iti pulisya iti BCPO PS 7 ken QCPD PS10 para iti pannakasarak iti nasao a menor de edad. //Bombo Khey Reparip
