Inlaksid ni Bokod Mayor Erik Donn Ignacio ti plano ti Baguio City a mangala iti danum manipud iti Ambuklao Dam sadiay Bokod, Benguet, kas solusyon iti water shortage iti siudad.
Daytoy ket iti tengnga ti panangipaay iti konsiderasyon iti manamnama a nakaro nga epekto ti Super El Niño kadagiti maudi a bulan ti 2026 ken kadagiti umuna a bulan ti 2027.
Maipalagip a tinawen a mapaspasaran iti siudad ti parikut iti suplay ti danum, nangruna iti summer season.
Gapu iti daytoy, panggep ti siudad a mangala iti danum manipud iti Ambuklao Dam tapno makatulong iti pannakaipaay ti suplay ti danum iti siudad.
Nupay kasta, saan daytoy a pinaburan ni Mayor Ignacio .
Sigun iti mayor, nagturong dagiti staff ni Baguio City Mayor Benjamin Magalong ken dagiti developers manipud United Kingdom, sadiay Bokod tapno ipresentar dagiti plano para iti proyekto.
Ngem sigun kenni Mayor Ignacio, patienna a saan nga umdas ti danum iti Ambuklao Dam tapno maipaay ti suplay ti danum a kasapulan ti siudad ti Baguio.
Innayonna pay a kasapulan met laeng ti munisipyo ti Bokod ti danum , nangruna kadagiti mannalon, dagiti addaan iti fishpond, ken suplay ti danum a kasapulan ti hydropower plant ti munisipyo.
Kabayatanna, impaganetget ti Mayor a nupay saan a maipatungpal iti agdama a panawen ti plano ti Baguio City, kasapulan pay laeng ti nauneg ken atiddog a panaggadal iti daytoy. //via Bombo Khey Reparip
