Kinumpirmar ti Public Order and Safety Division (POSD) nga adda dagiti peddlers a naggapu iti rehiyon Cordillera, nangruna dagiti aglaklako iti siudad ti Baguio.
Sigun kenni Daryll Kim Longid, Chief ti POSD, uray adda dagiti peddlers a naggapu iti rehion, adda ti nagdudumaan dagiti ugali dagiti aglaklako manipud Cordillera ken dagiti naggapu kadagiti sabali a probinsya.
Imbinglayna a maipapan iti ugali dagiti peddlers manipud Cordillera, saan a dagitoy a nalaka a sumrek iti panagbalubal, uray pay no dadduma ket makipagargumentoda kadagiti mangsita kadakuada.
Kabayatanna, kinuna ti opisyal a mabalin met a matulungan dagiti peddlers iti siudad no mismo nga agdawatda iti tulong.
Nupay kasta, maysa kadagiti problema a nakita ni Longid ket dagiti peddlers a nabayagen nga ar-aramidenda daytoy a pagbiagan, isu a pinilida a pagtalinaeden ti panaglakoda iti kalsada.
Maibasar iti report, mabalin a dumanon iti P1,500 agingga P2,000 ti neto a magun-od dagiti peddlers, ngem adda dagiti agduduma a mangipaay kadakuada iti pondo.
Mainaig iti dayta, kinuna ni Daryll Kim Longid, Chief ti POSD a mapapati a saan a pulos nga agmaymaysa dagiti peddlers manipud kadagiti dadduma a probinsya, agsipudta mabalin a maorganisar dagitoy babaen kadagiti mangipapaay iti pondo wenno dagiti financiers.
Nupay kasta, dagiti peddlers manipud Baguio ken Benguet ket inlawlawagna a mabalin a bukodda laeng nga inisyatibo ti panaglako dagitoy.
Imbinglayna metlaeng ti opisial nga adda ti koordinasyon ti POSD kadagiti barangay iti siudad, nangruna iti Barangay Malcolm Square, a nagkiddaw iti tulong ti ahensya gapu kadagiti peddlers a sumungbat wenno lumaban no masita dagitoy.
Inaklon ni Longid a kasapulan pay ti ad-adda a nasayaat a koordinasyon ti POSD ken ti pulisya tapno nasaysayaat a maresut dagiti reklamo ken insidente a mainaig kadagiti peddlers.
Imbinglayna a babaen iti panagkaykaysa dagiti concerned agencies ken barangay officials, mabalin a maipaay ti umno a panangipatungpal kadagiti pagannurotan ti siudad maipapan iti panagilako iti parapubliko a lugar.
Inlawlawagna a nasken a maipatungpal dagiti pagannurotan babaen iti umno a proseso, bayat a maikonsidera met ti kasasaad dagiti peddlers a mangsapul iti pagbiagan dagitoy.//Bombo Khey Reparip
