Napagbalin a waiting shed ti sigud a makeshift sadiay Purok 4-A, Brgy Lucnab, Baguio City babaen ti initiatiba ken panangpondo iti Baguio Mabikas Eagles Club.
Sigun kenni Jimmy D. Daclan, Presidente ti Baguio Mabikas Kamandag Eagles Club, ti nasao nga initiatiba ket tulong para iti publiko nangruna kadagiti studyante tapno adda iti paglinunganda tunggal agtudo.
Inlawlawagna a babaen iti panagtitinulongda ti nasao a grupo, nabaelanda nga ibangon ti waiting shed nga aggatad iti agarup P40,000.
Innayun ni Daclan a saan laeng nga idiay Barangay Lucnab ti napatakderanda ti waiting shed ken tumultulong metlaeng dagitoy kadagiti nauraman, kadagiti pagadalan babaen ti panangipaay ti anyaman a kasapulan, optical mission ken daduma pay a mabalin dagitoy a maitulong nangnangruna kadagiti agkasapulan.
Agyamyaman met ti nasao a lider iti suporta dagiti Barangay Officials iti Brgy Lucnab.
Iti sabali a bangir, agyamyaman ni Brgy Chairman Pablo Abluyen iti pannaipasdek ti nasao a waiting shed gapu ta dakkel a tulong daytoy iti Barangay Lucnab ken komunidad.
Inlawlawag ti opisyal a a sigug a maar-aramat daytoy a pagbakunaan ken pagkaponan kadagiti aso,pangipaskilan ti notices. Nupay kasta, gapu ta makeshift laeng daytoy, masinga ken malpas a dagus ti aktibidad tunggal agtudo.
Ita a naisimpa, manmanama a maaramat metlaeng daytoy kadagiti dadduma nga aktibidad iti babbangay kasta metlaeng iti everyday use kas iti pag-urayan ti lugan, ken dadduma pay.
Nagpalagip met daytoy iti komunidad a sapayla kuma ta maaywanan ti nasao a waiting shed ken maliklikan ti panangsuray iti daytoy kas kas panangaywan ken panangrespeto kadagiti nag-initiate iti pannakapasayaat ti nasao a pasilidad wenno proyekto. //via Bombo Noveh Organo
