Naitaray iti ospital ti 19-anyos a lalaki a residente sadiay Pinsao Pilot Project, Baguio city kalpasan a nairaman daytoy iti gulo sadiay Mines view jeepney terminal iti paset ti Calderon street, Baguio city.
Maibasar iti report ti pulisya, nakaawat ti BCPO station 7 iti awag manipud iti Mobile Patrol Unit personnel nga adda ti nadangran nga indibidual iti nasao a lugar.
Iti initial nga impormasyon a nakalap ti otoridad, nairaman ti biktima kadwana dagiti babarkda iti gulo kontra iti saan a nabigbig a grupo.
Nabaelan ti grupo ti biktima a makalibas paturung iti maysa a gasolinaan sadiay Harisson.
Naduktalan a nagsagrap ti biktima iti sugat isu’t gapuna a nagturongda iti opisina ti pulisya.
Naiturong iti ospital ti biktima para iti pannakataming daytoy bayat a dagiti dadduma pay a personnel ti pulisya ket nagturung iti nakapasamakan ti insidente para ti beripikasyon ngem awanen dagiti grupo a nakaapa ti grupo ti biktima.
Iti kaudian a report ti otoridad, saan pay a nakaruar ti biktima ken saan pay a naduktalan ti rason ti pannakadangran daytoy.//Bombo Noveh Organo
