Kinomendaran ti City Social Welfare Development Office (CSWDO) ti aktibo a pannakipaset dagiti ubbing iti 2026 Children Congress itay nabiit.
Ti nasao nga aktibidad ket paset iti 2026 National Childrens’ Month nga addaan tema a “Manindigan, Tumugon, Kumalinga:” Sa batang handa, Mas ligtas ang Bansa.”
Sumagmamano kadagiti natalantan iti nasao a congress ti “Identifying Children and Youth at Risk: Boosting Resiliency and Building Safer Communities” nga tinalantan ni Ulysses Dalog, CFPSI Advocacy Officer; ken ” Young minds to great leaders: The Role of children in tomorrows advancement” a tinalantan met ni Councilor John Rhey Mananeng , presidente iti SL Federation.
Malaksid ti dayta, napasamak metlaeng ti open forum ken panagbotos kadagiti officers iti Federation of Children Representatives.
Kabayatan ti open forum a dinar-ayan metlaeng ti City Mobile Force Company iti Baguio City Police Office, lecturers, ken Persons with Disability Affairs Office (PDAO) nga infacilitate ti CSWDO, naiparang kadagiti ubbing nu kasanu a agkuri iti 911.
Mainaig iti dayta, nagpalagip ni Police Chief Master Sergeant (PCMS) Graciano C. Bitaga, team leader ti nasao a unit kadagiti ubbing a saanda nga aramaten ti 911 para ti saan a napapateg a banag gapu ta ti 911 ket nabukel para ti importante wenno emergencies no sadino biag ti mapagsasaritaan.
Daytoy ket kasaruno ti naaw-awat nga awag manipud kadagiti agtutubo nga agkidkiddaw ti panangiverify kadagiti nobyo ken nobya da, nangnangruna idi kaiyusyuswat ti 911.
Iti sabali a bangir, sumagmamano nga ubbing ti nagsaludsod kabayatan iti open forum ti napatungpal kagidan iti 2026 Children Congress itay nabiit.
Karaman kadagiti nadamag dagitoy ket maipapan iti rason ti nangina a multa ti anyaman a violation kas iti panangiwara iti basura idiay Burnham Park, deployment ti kapulisan kadagiti pagadalan ken nu asino ti maasitgan a pagkiddawan iti tulong nu adda dagiti mangpilpilit a dumawat ti kuwarta manipu kadakuada ken dadduma pay.
Inlawlawag met ti pulisya a dagiti gatad ti multa ket nakabasar iti ordinansa nga inaramid to City Government nga isu met ti iyem-implementer ti pulisya.
Nu pay kasta, inlawlawag ti pulisya nga adda ti community service a maipatpataw nangruna nu first time offender dagiti matiliwan.
Inlawlawag metlaeng ti pulisya a ti strategic deployment ti kapulisan kadagiti pagadalanan no sadino tunggal panagserrek, lunch break, ken panagawid laeng nga agturturong dagiti pulisya kadagiti pagadalan gapu kadagiti dadduma a trabaho ken deployment nga asikasuenda.
Nupay kasta, impanamnamada a nakasagana a kanayun dagitoy nga agresponde iti kanito nga adda dagiti saan a nasayaat a pasamak iti uneg ti pagadalan. // via Bombo Noveh Organo
