Impeksa dagiti negosyante a Chinese-Filipino ti danagda nga amangan a maapektaran ti negosyoda gapu iti kumarkaro a tenston iti nagbaetan ti Pilipinas ken China.
Nagballaag ni Victor Lim , presidente ti Federation of Filipino Chinese Chambers of Commerce and Industry Inc. (FFCCCII) iti gobyerno a ti panggepda a panangipataw iti sanction kontra kenni Chinese Ambassador Jing Quan ket mabalin a mangitunda iti panagbaba ti ekonomiya ti pagilian.
Kagidan daytoy ti maidagdagadag a maysa a resolusyon idiay senado a mangkonkondenar iti nagbalin nga statement ti embahador seknan iti kabaelan ti China iti military confrontation.
Sigun met iti Federation of Filipino Chinese Chambers of Commerce and Industry Inc. (FFCCCII) , saan nga ita ti umno a panawen tapno patawan iti pannusa ti pagilian.
Sigun kenkuana, napateg unay ti trading ti pagilian iti China gapu ta daytoy ti kangrunaan a pagtataudan ti imports ti Pilipinas.
Malaksid iti dayta, ti Tsina metlaeng ti maikapat a kangrunaan nga export market dagiti produkto ti pagilian.
Gapu iti daytoy, kidkiddawen ti grupo iti gobyerno nga idalanda laengen iti naannayas a dayalogo ken mangipatungpalda iti restraint tapno mapagtalinaed latta ti nasayaat nga investment climate iti nagbaetan ti dua a pagilian.
