Impeksa ni PolCol Genevieve Revocal, Police Information Officer iti Police Regional Office Cordillera, a manageable ti security situation dagiti pagadalan iti rehion Cordillera.
Sigun kenkuana, agtultuloy dagiti initiatiba da tapno mapapigsa ti koordinasyon ken kooperasyon kadagiti school administrators babaen kadagiti programa a nakapokus iti panangsalaknib iti seguridad dagiti estudyante, mannursuro, ken dadduma pay a personnel iti pagadalan.
Impasiguradona pay a nabigbigda dagiti sumagmamano a security concerns dagiti pagadalan iti kasta metten a napagtal-talantanandan dagiti maitutop a security measures tapno maliklikan dagiti posible nga insidente a mabalin a mangriribuk iti kinatalged dagiti estudyante ken personnel iti pagadalan.
Kabayatanna, impeksana ti kinapateg ti komunikasyon iti uneg ti pagtaengan, nangruna iti nagbaetan dagiti nagannak ken annak, tapno makita ken maamuan dagiti kapamilya dagiti posible a red flags wenno dagiti senyales a mabalin a mangipakita iti panagbalbaliw iti kababalin dagiti annakda.
Sigun kenkuana, masapul a maaddaan iti nasayaat a panagkikinnablaaw ken panagdengngeg dagiti nagannak kadagiti annakda tapno makasaritada dagitoy maipapan kadagiti parikut, pakaseknan, wenno aniaman a napasamak kadakuada iti uneg ken ruar ti pagadalan.
Babaen iti daytoy, maawatan dagiti nagannak no adda dagiti banag a mangriribok kadagiti annakda.
Innayonna a masapul met a saan nga iwaksi dagiti nagannak dagiti makitada a panagbalbaliw iti kababalin, rikna, ken aramid dagiti annakda, nangruna no adda makitada a panagmaymaysa, panagbuteng, wenno dadduma pay a saan a gagangay a tignay.
Babaen iti nasayaat a panangbantay, panangisuro, ken panangsuporta kadagiti annak, mabalin a makatulong dagiti nagannak iti pannakasalaknib kadakuada manipud kadagiti posible a peligro. //via Bombo Khey
