BAGUIO CITY- Pimmusay ti Punong Barangay ti Datakan, Kapangan kalpasan a naaksidente ti naglugananda a jeep sadiay Barangay Gaswiling idi parbangon.
Nabigbig daytoy a ni Jeffrey Batinay Marcelo, agserserbi nga ABC Presidente ken agngay-ngayangay kas konsehal ti Kapangan.
Natalged met ti kasasaad ti lima a kakadwana a pasahero.
Maibasar iti report ti pulisya, dimmar-ay ni Marcelo ken ti kakadwana iti rally sadiay Baguionas, Gaswiling ken paawid koma dagitoy idi napukawan iti preno ti lugan iti pasalog a paset ti kalsada.
Sigun pay iti report, nagalis ti kalsada rason a saan a nakontrol ti driver ti manobela agingga a naidungpar ken nabaliktad ti lugan.
Timpuak ni Marcelo rason a naipit iti rear portion ti lugan.
Naitaray daytoy iti ospital ngem naideklara a pimmusay.
