BAGUIO CITY – Inaprobaranen ni Presidente Rodrigo Duterte ti gakat a linteg a mangbaliw iti nagan ti maysa a secondary national road iti probinsia ti Benguet kas pammadayaw keni sigud a Benguet Governor Bado Dangwa.
Naimpormaran ti Sangguniang Panlalawigan ti Benguet a pinirmaanen ti presidente ti Republic Act No. 11042 wenno ti linteg a nangsukat iti nagan ti Acop-Tublay-Kapangan-Kibungan-Bakun-Sinipsip, Buguias Secondary National Road.
Sagudayen ti linteg a maawaganen ti nasao a kalsada kas Governor Bado Dangwa National Road kas panangbigbig iti serbisyo publiko ni Dangwa kadagiti tattao ti Benguet kas mabigbigbig a soldado bayat ti panagsakop dagiti Hapon, kas negosyante, lider ken gobernador sakbay ti martial law.
Naibilin iti baro a linteg ti panangimuntar ti DPWH iti umno a markers iti deppaar ti Governor Bado Dangwa National Road ken iti panangiruarda iti kaskenan a pammilin tapnu maimplementar ti linteg.
Naipasngay ni Dangwa sadiay Kapangan, Benguet ken namin dua a nadutukan daytoy kas gobernador ti Mt. Province idi 1954 agingga 1959 ken idi 1960 agingga 1963.
Naipasdek pay bayat ti takemna idi 1954 ti Amburayan Bridge sadiay Kapangan.