Sumangsango ita ni House Deputy Minority Leader ken ACT Teachers Party List Representative France Castro iti ethics complaint nga impila ti Ata-Manobo Tribal Council of Elders ken dadaulo ti Talaingod Political Structure.
Nagtaud ti reklamo manipod iti desision ti Tagum City Regional Trial Court idi bulan ti Hulio, a nangkonbiktar kenni Castro ken dadduma pay gapu iti panaglabsingda iti Special Protection of Children Against Abuse, Exploitation and Discrimination Act.
Sigun kadagiti hues ti nasao a korte, nakaaramid dagiti akusado kadagiti aramid a makadangran iti kinatalged ken pagimbagan dagiti 14 a menor de edad nga agad-adal iti Lumad, idi inbiaheda dagitoy manipod Talaingod, Davao del Norte idi Nobiembre 2018 iti agarup tallo nga oras iti nasulinek, nasipnget, ken saan a natalged a kalsada nga awan ti tulong dagiti pannakabagi ti linteg, aniaman nga ahensia ti gobierno ken awan ti naipakita a pammalubos manipud kadagiti nagannak dagiti menor de edad.
Inlawlawag ni Atty. Israelito Torreon, legal counsel dagiti agrekreklamo a kasapulan a masuspindir ken maikkat iti puesto ni Rep. France Castro gaputa nakonbiktar daytoy babaen iti Regional Trial Court numan pay nagapela daytoy iti nangato a korte.
Nupay kasta, inlaksid ni Castro ti ethics complaint, ken inawaganna daytoy a “harassment suit”.
