BAGUIO CITY – Impannakel ni Baguio City Mayor Benjamin Magalong nga ad-adda a pimmartak ti panagbakuna kontra COVID19 ditoy Baguio City.
Sigun kenkuana, naksayan ti oras ti screening procedures ti panagbakuna isu’t gapuna a dumanon itan iti 1,100 ti bilang dagiti mabakbakunaan iti tunggal aldaw manipod iti sigud a 700 agingga 800.
Kinunana a manipod iti sigud a 22 a minuto a mabusbosbos tunggal pasiente ket dumanon laengen ita iti pito agingga walo a minutos.
Dinakamatna nga inadaptarda dagiti wagas iti panagbakuna kadagiti dadduma a pagilian para iti napartak a panagbakuna.
Ipaspasigurado pay ti nasao nga opisyal nga awan iti malabsing iti pagalagadan iti Health Department ken iti Interagency Task Force.
Kagiddan iti daytoy, imbinglay ni Mayor Magalong a dumanonen iti 73, 000 ti pakabuklan a bilang dagiti bakuna kontra COVID19 ti naawat ti siudad
Adda pay ti manamnama a kanayunan a 3,000 a bakuna ti Pfizer a maisangpet ditoy syudad a mangitunda iti 76,000 a pakabuklan a bilang dagiti naipaay a bakuna iti Baguio City .
