BAGUIO CITY – Mangnamnama ti dadaulo ti City Tourism Office ti Baguio nga ad-adu pay a turista ti sumarungkar ditoy siudad ita a bulan ti Hulyo.
Iti panakiuman ti Bombo Radyo Baguio, kinuna ni Engr. Alec Mapalo a simmayaaten ti sektor ti turismo ti siudad manipud idi napalabas a bulan ti Hunyo agingga iti umuna a lawas ti agdama a bulan.
Dinakamatna a manipud napalukayan ti travel restrictions iti NCR Plus idi Hunyo 1 ket dimmanon iti 12,000 a turista ti nagturong iti siudad ken kaaduan ket nagtaud iti NCR Plus.
Kinunana nga adayo a nangatngato ti nasao a bilang no idilig iti 2,000 a bilang dagiti turista a nagturong iti siudad idi Abril ken Mayo, no sadino, dagitoy ket nagtaud kadagiti dadduma a probinsia iti ruar ti NCR Plus.
Kabayatanna, dinakamat ni Manalo nga umno laeng ti tallo ribo a bilang dagiti turista a naituding nga innaldaw nga akseptaren ti Baguio.
Inlawlawagna a kas maibasar kadagiti napalpalabas a datus ket 60% laeng kadagiti nagrehistro iti Baguio VISITA website ti nagtungpal iti plano dagitoy a panagsarungkar ditoy siudad.
Dinakamatna nga idi napalabas a weekend ket dimmanon laeng iti sangaribo a turista ti simrek iti siudad iti baet a tallo ribo dagiti nagrehistro.
