BAGUIO CITY – Manamnama nga ad-adu pay a kameng ti rebelde a grupo ti sumuko iti gobierno kadagiti sumaruno a tawtawen.
Sigun ken ni Presidential Peace Adviser Secretary Carlito Galvez Jr., posible nga 80 porsiento kadagiti kameng ti New People’s Army (NPA) iti Cordillera ken dadduma pay a paset ti pagilian ti sumuko iti gobierno agingga inton 2022.
Inlawlawagna a maysa kadagiti kangrunaan a rason iti isusuko dagiti makakannigid nga indibidual ti economic support nga ipapaay ti gobierno.
Impeksa pay ni Galvez ti panangsuportana iti programa ti Cordillera-PNP no sadino, maal-allukoy dagiti lokal a gobierno a mangideklara kadagiti rebelde kas persona non grata tapno maupay dagitoy a manglaban iti gobierno.
Maipalagip nga idi kalman, indauluan ni Galvez ti pannakadadael ti nagduduma nga armas iti sidong ti Normalization Program para iti Cordillera Bodong Administration – Cordillera People’s Liberation Army (CBA-CPLA) sadiay Camp Bado Dangwa, La Trinidad, Benguet.
