BAGUIO CITY – Manamnama nga ad-adu pay a maikari a residente ti Benguet ti agnumar iti Handog Pabahay Project ti Benguet Provincial Police Office (PPO).
Kasaruno daytoy ti seremonya a naangay sadiay Basil, Tublay, Benguet a nangipaimaan ti Benguet PPO iti maysa a balay iti maysa a senior citizen ken person with disability.
Sigun kenni PLt.Col. Benzon Macliing, dadaulo ti Benguet 2nd Provincial Mobile Force Company, dagitoy ti nangipatunggpal iti proyekto a naponduan ti P300,000 a nagtaud iti donasyon dagiti pulis ken pribado nga indibidual.
Kinunana a rinugyanda ti proyekto idi September 14 ken nalpasda kalpasan ti makabulan.
Dinakamat met ni PCol. Reynaldo Pasiwen, dadaulo ti Benguet PPO a puntiryada nga ipatungpal ti proyekto kadagiti amin a munisipyo ti probinsia.
Inlawlawagna a tunggal istasyon ti pulisya iti probinsya ket agbiruk iti maikari a benipisaryo nga agnumar iti maipatakder a balay.
Innayonna pay a malaksid iti pabalay ket adda metlaeng ti programada a panangipaay ti danum ken dadduma pay. (report ni Bombo Brigitte Marcasi)
