Baguio City- Indeklara ti Commission on Elections Second Division a nuisance candidate ni Adam Yap kas kandidato iti kinakongresista ti Benguet Province.
Babaen iti Comelec Resolution ( SPA 24-023) a pinirmaan da Presiding Judge Marlon S. Casquejo, Commissioners Rey E. Bulay ken Nelson J. Celis a naipaulog idi Nobiembre 26, ditoy a pinaboran ti Comelec ti petisyon ni incumbent Benguet Cong. Eric Go Yap nga ideklara a nuisance candidate ni Adam Yap.
Nakalanad iti resolusyon ti Comelec 2nd Division a kalpasan ti nainget a panagsukimatda iti rekords, naduktalan da nga awan ti “genuine ” wenno pudno nga intensyon ni Adam Yap a tumaray iti public office nu sadino mangipaay daytoy iti dakkel a risgo iti election process.
Naammuam pay a ni Adam Yap ket awanan ti agdama a negosyo wenno pangalaan ti pundo nga aramaten na iti panagkampanyana nu sadino ket naibutaktak pay nga awanan isuna ti nalawag a programa, plataporma ken solusyon kadagiti agdama nga isyu kalpasan ti pangangipila na ti Certificate of Candidacy.
Dakkel pay a pakaseknan a ti respondent ket awanan iti “legitimate public purpose” a mangitunda iti panakariro ken pannakatikaw dagiti botante.
Maipalagip a nangipila ti COC ni Adam Yap idi Oktubre 1 para iti lone district congressman ti Benguet ngem dagus met lang nga imbabawi na daytoy idi Oktubre 16.//JT
