Pinasayaat ti Department of Education (DepEd) dagiti addang tapno mapapigsa ti panagsagana dagiti pagadalan para iti didigra ken dadduma pay nga emerhensia babaen ti panag-update ti nasao nga ahensia.
Impaganetget ti Department of Education (DepEd) ti kinapateg ti Learning and Service Continuity Plans (LSCPs) no maipapan iti panangkessay iti pannakasinga ti panagadal.
Iti DepEd Order No. 022, s. 2024, nangipaay ti ahensia kadagiti narebisar a pagannurotan maipapan iti pannakasuspendir ti klase ken trabaho kadagiti pagadalan bayat ti bagyo ken tropical cyclones, napigsa a tudo ken layus, ginggined, pannakapukaw ti koriente, nakaro a pudot, nababa a kalidad ti angin, ken dadduma pay nga emerhensia ken peggad.
Ad-adda pay a nangipaay ti polisia ti nasao nga ahensia kadagiti addang tapno masigurado ti kinatalged ken pagimbagan dagiti estudiante ken mannursuro bayat a maipasigurado ti panagtultuloy ti panagsursuro.
Ti Learning and Service Continuity Plans (LSCPs) ket mangibilin kadagiti field office ken pagadalan a kitaen dagiti maitutop nga Alternative Delivery Modes (ADMs) para iti edukasion, a mangipasigurado nga uray didigra ket adda iti access ti “learning resources.”
Sigun iti Department of Education (DepEd), dagiti Alternative Delivery Modes (ADMs) ket mabalin a pakairamanan ti modular distance learning, online education, wenno blended approaches.
