BAGUIO CITY – Adu paylaeng a pagtaengan iti probinsia ti Benguet ti awanan ti koneksion ti kuryente agingga ita a panawen.
Sigun kenni Engr. Ramel Rifani, manager ti Network Service Department ti Benguet Electric Cooperative (BENECO), daytoy ket gaputa umad-ado dagiti settlers iti nagduduma a sitio kadagiti barangay iti probinsia.
Kinunana saan a napartak ti panangikabitda ti kuryente kadagiti dadduma a sitio iti Benguet gapu iti kaadayo dagitoy ken magna ti electrification iti umno nga proseso.
Sakupen ti proseso ti panagisumitir iti kiddaw dagiti agpakabit ti kuryente, panakaisayangkat ti inspeksion ken beripikasyon ken maiyaplikar pay iti National Electrification Administration sakbay a marugian ti panakaipatakder dagiti poste ti kuryente.
Nupay kasta, impanamnamana nga ikagkagumaanda a papartaken ti proseso ti panakaipaay ti silaw kadagiti sitio iti Benguet tapnu dagus a maipaayanda ti suplay ti kuryente.
