BAGUIO CITY – Umad-ado dagiti umili iti Benguet ti maaw-awis nga agtaraken ti baboy gapu iti nangina a presyo daytoy iti merkado publiko.
Dinakamat daytoy ni Provincial Veterinarian Dr. Miriam Tiongan iti eksklusibo a panakiyuman ti Bombo Radyo Baguio no sadino kinunana a naobserbaranda kabayatan ti panagrikosda iti nagduduma a munisipyo nga ado a residente ti interesado a mangpaado iti baboy kasaruno metlaeng iti panagraira ti African Swine Fever idi napan a tawen a nangapektar iti demand ken suplay ti baboy iti lokalidad.
Dinakamatna a gapu iti daytoy ket agtultuloy ti panagrikosda iti tunggal ili ti probinsiya tapno ipakaammo ti kinapateg ti biosecurity measures iti panagtaraken ti baboy.
Babaen iti daytoy, maliklikan ti panakapataud ti aniaman a sakit wenno virus a mabalin a kumpet iti taraken a dingwen.
Iti agdama ket bambantayan ti opisina da Dr. Tiongan , babaen iti panakibinadangda iti Department of Agriculture Cordillera, ti munisipyo ti Kapangan, Kibungan ken Bakun nga immunan a nakailista iti ado a bilang ti napapatay a baboy gapu iti ASF.
Kidkiddawenda met iti Bureau of Animal Industry ti panakaideklara ti Kabayan ken Mankayan kas ASF-free kalpasan nga awanen ti nailislistada a kaso ti ASF.
Kabayatana, kinuna ti opisyal nga ad-adda a nairtengan ti panagbantayda kadagiti border checkpoints tapno malapdan ti panakaiserrek dagiti saan a dokumentado a karne ti baboy a nagtaud iti sabali a lugar.
Innayon pay ni Tiongan nga agtaltalinaed a nangato ti presyo ti karne ti baboy iti probinsya a nangitunda iti nababa a demand ti nasao a produkto.
