BAGUIO CITY – Maguyguyugoy dagiti youth organizations a makipasetda iti panagpatalinaed iti kinadalus dagiti parke iti siudad ti Baguio.
Kasaruno daytoy ti panakaisayangkat ti Adopt-A-Park partnership a naangay sadiay Park Drive Garden, Pacdal Circle, Baguio city.
Panggep ti programa nga ipamaymaysa ti panagkonsulta dagiti Partner Volunteers iti gobyerno ti siudad babaen iti City Environment and Parks Management Office tapno tumulong, mangipaay ti suporta ken assistance iti panakaipatungpal dagiti programa ken proyekto a mangpapintas pay iti kondisyon dagiti parke a masarakan iti siudad.
Karaman kadagiti Partner Volunters ket dagiti government ken non-government agencies a pakairamanan ti Baguio City Police Office – Public Information Office ken Pacdal Police Station 3, Baguio Water District, Philippine Statistics Authority – Cordillera, Social Security System, Rizal National Elementary School, ken dadduma pay.
Iti interview ti Bombo Radyo kenni PMaj. Harriet Bulcio, panakangiwat ti Baguio City Police Office, kinunana a napateg ti akem ken panakipaset dagiti youth organizations iti nasao a programa para iti panangpasayaat iti aglawlaw ti siudad.
Impettengna a napateg metlaeng nga adda dagiti madutokan a mangaywan ken mangdalus kadagiti parke gapu ta daytoy ti maysa kadagiti kangrunaan a pagturturongan dagiti residente ken turista.//Bombo Jez Lapizar
