BAGUIO CITY – Agtaltalinaed kadagiti morgue sadiay United Kingdom (UK) ti bangkay ti dadduma a pimmusay gapu iti COVID 19.
Iti eksklusibo nga interbyu ti Bombo Radyo kenni Bombo International Correspondent Marben Orfiano, biochemist wenno medtech sadiay UK ken tubo ti Itogon, Benguet, kinunana a nakapreserba kadagiti morgue ti bangkay ti dadduma kadagiti pimmusay a health workers sadiay.
Inlawlawagna a manipud iti pakabuklan a bilang dagiti pimmusay sadiay UK gapu iti COVID 19 ket 20 porsiento kadagitoy ti health workers a pakairamanan ti adu a Pilipino.
Kinunana a raraemen ti gobierno ti UK ti karbengan dagiti pimmusay a health workers isut gapuna a saan a basta basta ti pannakaitabon dagitoy.
Dinakamatna a mapaplano no ania ti pamay-an iti pannakaitabon dagiti pimmusay a health workers sadiay ken naipaayan iti 60,000 pounds ti pamilia dagitoy kas tulong.
Kabayatanna, kinuna ni Orfiano nga adalen ti gobierno ti UK no mapalukayan dagiti paglintegan sadiay.
Kinunana nga iti agdama ket agtultuloy dagiti istrikto a protocols sadiay tapno maparmeken ti COVID 19.
Innayon ni Orfiano nga agtultuloy ti pannakaipatungpal dagiti panagsirarak tapno adda ti madiskobre a bakuna wenno agas kontra iti COVID 19.
Nakairekord ti UK iti nasurok 201,000 a positibo a kaso ti COVID 19 ken nasurok 30,000 dagiti pimmusay.
