BAGUIO CITY – Napukawan iti trabaho ti adu a Pilipino sadiay Denmark gapu iti parikot iti COVID-19 pandemic.
Iti interbyu ti Bombo Radyo ken ni Analyn Busk, maysa a Pilipino a restaurant manager sadiay Denmark, kinunana nga apektado dagiti Pilipino iti panagrikep ken pannakalugi dagiti kompania sadiay.
Dinakamatna a daytoy a mismo ket naapektaran ti negosiona gapu iti krisis a resulta ti COVID 19.
Iti baet daytoy, agyamyaman lattan ni Busk gapu ta kaaduan nga empleado sadiay Denmark ket addaan iti employment ensurance.
Kinunana nga uray napukawan dagitoy iti trabaho ket adda latta ti sueldo a maaw-awatda gapu iti ensurance.
Kinunana a dagiti met awanan iti employment ensurance ket makaaw-awat latta iti tulong manipud iti gobierno ti Denmark.
Nupay kasta, kinunana a gapu iti nasao a sitwasion ket saanen a makapaw-it ti dadduma a Pinoy sadiay iti kuarta iti pamiliada ditoy Pilipinas.
Maibasar iti report, dumanonen iti nasurok 7,500 ti positibo a kaso ti COVID 19 bayat a nasurok 360 dagiti pimmusay gapu iti nasao a sakit sadiay Denmark.
