BAGUIO CITY – Nakemmeg ti siam a tattao iti nagsina a checkpoint dagiti otoridad iti national highway sadiay Tinglayan, Kalinga gapu iti panangibiaheda iti marijuana.
Nakumpiskar iti umuna a checkpoint sadiay Barangay Bangad, Tinglayan ti 16 a marijuana bricks, 16 a reppet ti marijuana plants ken dadduma pay a marijuana derivatives manipod iti maysa a van.
Nakemmeg ti driver ti nasao a van a nabigbig a ni Brenson Bador, pakairamanan dagiti pasahero daytoy a da Andrew Adem, 34-anyos a residente ti Muntinlupa; Melvin Espina, 23-anyos a residente ti Biñan, Laguna ken ti maysa a 17- anyos a lalaki a residente ti Alicia, Isabela.
Nakumpiskar met iti maikadua a checkpoint sadiay Sitio Malasin, Barangay Poblacion, Tinglayan manipud iti maysa a van ti 11 a pakete ti napagango a marijuana leaves, 3 a ziplocks a naglaon iti napagango a marijuana leaves ken 2 a kawayan a naglaon metlaeng iti marijuana leaves.
Nangitunda daytoy iti panangkemmegda iti driver a ni Jeson Taguitag, 39-anyos ken residente ti Bado Dangwa, Tabuk City, pakairamanan dagiti pasahero daytoy a da Joshua Makinano Simeros, 27-anyos; Jude Patrick Amandy, 20-anyos ken Sedrick Cerin Caranta, 20-anyos, bin-ig a residente ti Sampaloc, Manila.
