BAGUIO CITY – Adun dagiti agpapa-schedule a sumang-at iti Mount Cabuyao sadiay Tuba, Benguet para iti masungad a Holy Week.
Gapu iti daytoy, nangipaulog ti lokal a gobyerno ti Tuba kadagiti istrikto a pagalagadan a kasapulan a suroten dagiti turista wenno sangaili a sumang-at iti nasao a bantay tapnu saan a maabuso daytoy.
Maipalagip a ti Mt. Cabuyao ti maysa a destinasyon a pagaayat a turturongen dagiti agpenpenitensia kabayatan ti Semana Santa nangruna ta masarakan sadiay ti tradisyonal nga Stations of the Cross.
Sigun kenni mayor Ignacio Rivera, nasayaat a tourism destination ti Mt. Cabuyao ngem kasapulan a maidevelop nangruna ta nabaknang kadagiti resources a mabalin a madiaya kadagiti turista.
Nupay kasta, impettengna a kasapulan nga adda dagiti paglintegan a mailatag tapnu saan a madadael ti aglawlaw ken saan a serreken dagiti restricted areas nga intuding ti DENR sadiay.
Innayonna nga adda dagiti maikabil a pagbasuraan ken comfort rooms iti nasao a bantay.
