BAGUIO CITY – Adu a lokal ken ganganaet a turista ti adda ita sadiay Sagada, Mt. Province tapnu makipagrambak iti maikanem nga Etag Festival iti nasao a lugar.
Segun kenni Municipal Tourism Officer Robert Pangod, nangrugi idi kalman ti nasao a festividad babaen iti civic parade ken agleppas ti aktibidad inton domingo.
Kinunana a naangay met ita nga aldaw ti cultural parade, ken nagpabuya dagiti nagduduma a barangay kadagiti sala a nakasilpo iti kultura ti Sagada.
Innayunna a naiparang met laeng dagiti Etag ken ti nadumaduma a produkto ti munisipyo.
Inlawlawagna a naawagan iti Etag festival ti nasao nga okasyon gaputa ti etag ti maar-aramat kadagiti ritual sadiay, manipud iti panakaipasngay ti maysa a tao agingga iti ipupusayna.
Kinunana a daytoy ti simbolo ti siklo ti biag ken kultura dagiti umili sadiay.
Ti etag ket ti naasinan a karne ti baboy a maidulin iti dua nga aldaw sakbay a mapaasokan ken mabalin a maipreserba iti uray makatawen wenno nasursurok pay.
