Inlawlawag ni Mayor Romeo Salda ti La Trinidad, Benguet a ti nagwaras a viral video seknan iti naibelleng a carrots ket saan a naiturong iti Benguet Agri-Pinoy Trading Center (BAPTC) para iti panakailakona.
Iti panakiuman ti Bombo Radyo kenni Salda, kinunana nga imberipikarna iti Benguet Agri-Pinoy Trading Center ti nasao a pakaseknan ken ditoy a naipakaamo kenkuana nga awan ti naiturong a carrot a saanda a ginatang.
Sigun kadagiti agtratrabaho sadiay, posible a ti carrots ket napanggep a mailako iti backfill, maysa a private trading area sadiay Km. 5 La Trinidad, Benguet.
Iti phone interview ti Bombo Radyo kenni Elsie Gis-it, adviser ti Benguet Agri-Pinoy Trading Center (BAPTC), naklaatda iti nagviral a damag maipapan iti carrot a naibelleng gapu ta saan a nagatang nga uray iti nababa a presyo a P3.
Kinuna ni Gis-it nga ar-aramidenda ti amin tapno awan ti nateng a masayang wenno maisubli rason a gatgatangenda iti nababa a presyo ken maipapaay kas relief a kas iti naited a sangapulo a sako ti carrot iti siudad ti Baguio.
Innayon ni Gis-it nga iti agdama ket matumal ti panakagatang dagiti nateng wenno awan unay ti gumatang.
Maysa a factor a makitkita iti nababa a presyo ket ti nagsabay-sabay a panakaimula ti carrot ken panagsabaysabay a panakaapit met laeng dagitoy.
Kabayatanna, impasigurado ni Gis-it nga ar-aramidenda dagiti amin nga addang tapno malako dagiti nateng dagiti mannalon a kas iti panakikoordinarda iti Department of Agriculture wenno iti probinsya ti Benguet.
